Deutsche Demokratische Partei

Die Dütschi Demokratischi Bardei (DDP) isch e linggsliberaali Bardei in dr Weimarer Republik gsi. Näbe dr Dütsche Volksbardei (DVP) het si zwüsche 1918 und 1933 dr politisch Liberalismus representatiert. Si isch 1918 us dr Fortschriddlige Volksbardei choo, wo 1917/1918 mit em Friedrich von Payer Däil vo de letschte zwäi Riichsregierige vom Kaiserriich gsi isch.

Noch dr Konstituierig vo dr Weimarer Republik het d DDP ab 1919 in wäggselnde Koalizioone – vo dr Weimarer Koalizioon aa – bi fast alle Riichsregierige bis 1932 mitgmacht. Vor dr Riichsdagswaal 1930 (14. Septämber 1930) het si sich mit dr Volksnazionaale Riichsveräinigung, wo zum nazionalistische und antisemitische Jungdütsche Orde ghöört het, veräinigt. Dr Naame vo dr Bardei isch vo denn aa Deutsche Staatspartei (DStP) gsi und het dä Naame bhalte, wo die Volksnazionaale scho bald wider d Bardei verloo häi. Wäge de Volksnazionaale häi Mitgliider vom lingge DDP-Flügel iiri Bardei verloo und gege s Ändi vo dr Republik zue die parlamentarisch erfolgloosi Radikaaldemokratischi Bardei gründet. Anderi si zur SPD gange.

Noch dr Machtergrifig vo de Nazionalsozialiste isch die Dütschi Staatsbardei im Raame vo dr Gliichschaltig am 28. Juni 1933 ufglööst worde.